Şair Məhəmməd Əlinin növbəti kitabı çapdan çıxıb. Kitab “Payız ovqatı” adlanır. Yüz səhifədən ibarət kitaba şairin son illərdə qələmə aldığı poeziya nümunələri toplanıb. “Payız ovqatı” bütövlükdə Məhəmməd Əlinin təbiət, cəmiyyət, habelə yaşadığımız zamanda baş verən hadisələrə münasibətinin poetik ifadəsidir.
Şair bu kitaba toplanan əsərlərində də əvvəlki ənənələrinə sadiq qalmış, təbiət və cəmiyyətin harmoniyasını vəhdət şəkildə ifadə etməyə nail olmuşdur. Onun əsərlərinin ana xətti vətən sevgisi, ilahi sevgi, insani sevgi, təbiət hadisələrinin tərənnümü və cəmiyyətdə baş verənlər tutur.
Kitabın redaktoru Azərbaycan Yazıçılar Birliyinin üzvü, “Xəzan” jurnalının baş redaktoru Əli bəy Azəridir.
Xatırladaq ki, Məhəmməd Əli 2005-ci ildən Yazıçılar Birliyinin üzvüdür. 2017-ci ildən “Xəzan” ədəbi-bədii jurnalın redaksiya heyətində təmsil olunur. Yaradıcılıqda fəaldır.
Hacıyev Məhəmməd Əli Namət oğlu 1 mart 1950-ci ildə Qəbələ rayonunun Qəmərvan kəndində anadan olub. İxtisasca mühəndisdir, Azərbaycan İnşaat Mühəndisləri İnstitutunu bitirib. Ali təhsilini başa vurduqdan sonra Bakı şəhərində qalaraq ixtisası üzrə işləyib. Hazırda təqaüddədir.
Gənc yaşlarından yaradıcılıqla məşğul olub. “Dağlardan ayrı”, “Sevincim acıdır, kədərim şirin”, “Özümü axtarıram”, “Söz sənindir”, “Çörəyimin duzu yoxdur”, “Gedirəm üzü gün doğana”, “Duyğularımı səpdim dənizə”, “Etiraf” və digər şeir kitablarının müəllifidir. 2020-ci ildə yaradıcılığına yenidən nəzər salaraq bəzilərini təkmilləşdirmiş, böyük əksəriyyətini bir yerə toplayaraq 740 səhifəlik “TOPLU” çap etdirmişdir.
Azərbaycan Dövlət Televiziyasında və radiosunda, eləcə də dövrü mətbuatda müntəzəm olaraq şeirləri və aktual mövzuları əhatə edən publisistik yazıları ilə çıxışlar edir.
Azərbaycan Yazıçılar Birliyinin, Azərbaycan Jurnalistlər Birliyinin və “Dirili Qurbani” ədəbi məclisinin üzvü olan şair “Qızıl Qələm”, “Məmməd Araz”, “Həsənbəy Zərdabi”, “Araz”, “Yurd və vətən fədaisi” və sair ədəbi mükafat və diplomlara layiq görülüb.
Şair Məhəmməd Əlinin bir çox şeirləri vardır ki, indiyə kimi heç bir şair həmin mövzulara toxunmamışdır.
İnanırıq ki, şairin “Payız ovqatı” kitabı da əvvəlkilər kimi qədirbilən oxucular, xüsusən də poeziyasevərlər tərəfindən rəğbətlə qarşılanacaqdır.