UNUT Kİ, UNUDUM MƏN DƏ
Sən özün əzəldən həsrəti seçdin,
Mənim sevdiyimi bilə-bilə sən.
Baxıb zövq alırdın əzablarıma,
Gəlirdin qarşıma gülə-gülə sən.
Mən səni istədim, həsrəti deyil,
Sevgi oyunundan bezar yaşdayam.
Bircə işarənlə Fərhad olardım,
Baxıb görərdin ki, dağda-daşdayam.
İndi həsrətimlə məzələnirsən,
Gördüm qələmindən şeirdə çıxır.
İndi gözəllərdə təzə qaydadır,
Aşiqin öldürüb, yasına çıxır.
Əhddən, etibardan söz açmısansa,
Qoy gəlim diz üstə yenə əhd edim.
Sən mənim sevgimə cavab ver gülüm,
Min dəfə dirilim, ölüm, cəhd edim.
Cəhd edim o əli min yol tutmağa,
Min yol qara bassın, ilğıma gedim.
Sən o əllərini çəkmə önümdən,
Dartınım kəndirdə, ulğuma gedim.
Bax, indi bu başa, bax bu meydana,
Edim kötüyündə sürütlə, gətir.
Sevgini qılınc tək əlində tutub,
Sevgimi sınağa çəkməyi bitir.
QOCALIQ YAŞI
Salam qocalığın bəxtəvər yaşı,
Xoş gəldin, xoş gəldin şahlıq taxtıma.
Sən yaşa yetməyi düşünməmişdim,
Doğmusan de hardan mənim baxtıma.
Nə olsun qocalıq dişlərin töküb,
O şəvə saçları yellər aparıb.
Qanadlı əllərim sözə baxmayır,
Xəstəlik ömrümdən illər qoparıb.
Dəlisov uşaqlıq, coşğun cavanlıq,
Xatirə selində kükrəyib gəlir.
Nobata getdiyim o qızla bırgə,
Közərən atəşdi bağrımı dəlir.
Hələ çiyinlərdə mizan-tərəzi,
Ölçüyə gəlməyən günahlarım var.
Birdəki nə vaxtsa həyan olduğum,
Xeyirxah işlərim yetiribdi bar.
Qocalıq tapılan dəfnə kimidir,
Fürsəti oğurla,, xəzinəni yar…
Kamillik yaşımsan mənlə birgə qal.
Səninlə görəsi neçə işim var.
