BU SƏHƏRİN ŞEİRİ
Sən adlı kölgələr ovutmaz məni,
Dəmirə, qayaya, daşa dönmüşəm.
Mənim ürəyimdə atəşin yanmaz,
Sən çatan ocaqda çoxdan sönmüşəm.
Doğmalıq ünvanım yadlığa dönüb,
Tilsimli qapımı sim-simin açmaz.
Mənim Göy Evimə ha boylan, ha bax,
Qapqara buludam ulduzum saçmaz.
Bu dəniz qırağı qırçın ləpələr,
Taleyi, qisməti yuyub aparır.
Sənin içindəki əlvida sözün,
Sənlə üsyan edib fəryad qoparır…
İNAN
İnsanın ağılı kamil olmasa,
Min öyüd-nəsihət yalandı, inan.
Üst-başın bəzəsən lələ, qumaşa,
Qanmaz gözlərində palandı, inan.
Nadan üçün sərvət dolu badə ol,
Ürəkdən bir kəlmə deməz də sağ ol.
Şah da olsan səxavətli, sadə ol,
Dünyada daima qalandı, inan.
Qocanın, yetimin köməyinə yet,
Ay Ayaz, mərd üçün ölümə də get.
Namərdə lap qul ol, min yaxşılıq et,
Qəfil bassan çalar, ilandı, inan.
