Vaxtım olsaydı
Bir vaxtım olsaydı şeir yazardım,
Qaçardım əlindən hikkənin, hirsin.
Baxıram hər yanda alver, bazardı,
Mən müştərisiyəm duyğunun, hissin.
Bir vaxtım olsaydı şeir deyərdim,
Özümü ağlardım hələ sağ ikən.
Yenə də köksümdə nəğmə göyərdi,
Varmı məntək qəmi mey kimi içən…
Bir vaxtım olsaydı, vaxtım olsaydı,
Nələri etməzdim gücüm çatası…
Deyirəm mənim də baxtım olsaydı,
Çıxıb getmiş idim burdan, qadası…
Çatışmır
Yenə söz çoxalıb aşır başımdan,
Yorğunam, yazmağa həvəs çatışmır.
Ayağım torpaqda, başım havada,
Canım atəşdədi, nəfəs çatışmır.
Baxıram milyoner olan yetimə,
Oxşayır bir azca sumsuk itimə.
Düşmüşəm zamanın təlatümünə,
Məhbusam, gen gündə qəfəs çatışmıır.
Yerimi tapmadım öz bazarımda,
Yalançı yazarlar söz bazarımda…
Canımı qoymuşam İntizarımda,
Azad olmağıma bir səs çatışmır.
Gəlir
Qırmızı xətti də, aşdılar, Qağa,
Buradan o yana qiyamət gəlir.
Mənim susacağım nöqtədən sonra,
Özümə etdiyim cinayət gəlir.
Ruhum qərar tutmaz bir an bədəndə,
Nidanı eşidib bilən o günündə.
Qərib qürbətini abad edəndə,
Ömrünə gözgörməz vilayət gəlir.
Hələ yollardadı, Bəxtiyar, köçün,
Az qalıb o günə, bir azca keçin.
Mən ki, müntəzirəm qayıdış üçün,
Vulkan bağırlıyam, qiraət gəlir.
10.02.2021
Ramiz İsmayıla
Mən gələndə bu dünyaya-
Nuh tufanı olmamışdı.
Qabilin ilkin tökdüyü
Habil qanı olmamışdı.
Yada gəlir adda-budda,
Var olmuşdum gözəl adda…
Mən girib çıxdığım odda,
Qır qazanı olmamışdı.
Xarı yoxdu onda gülün,
Ətri çoxdu tər sünbülün…
Minadakı İsmailin
Qoç qurbanı olmamışdı.
Bu dünyanı satanların,
Gözü açıq yatanların,
Yer üzündə şeytanların
Şər dövranı olmamışdı.
Əlli il çox kiçik savaş,
Vaxt ötürdük yavaş-yavaş…
Mən sevirdim onda, qardaş,
Eşq karvanı olmamışdı.
