Yazım
Vəkil, qalmısan harada,
Deyirəm bir günah yazım.
Ya yazım axşama qədər,
Ya saxlayıb sabah yazım.
Nurdu bir əlçim doğru da,
Həm yapıda, həm yoğruda…
Qoy canım yansın ağrıda,
Olsun dilim gümrah, yazım.
Həsrət bitib olmur tamam,
Haqq gələ ki, vüsal umam.
Xəttat olub qaşı İmam,
Gözləri bir Allah, yazım.
Ürəklərin boşluğuna,
Dərd yolunun daşlığına,
Hər fitrətin başlığına
Aləm yaxan bir ah yazım.
YENİ DƏN
Bala, biz əkənlər bara gəlmədi,
Bəslə sünbülləri yeni dən bağla.
Yaralı torpağa məlhəm unutma,
Açıb yarasını yenidən bağla.
Vətən baxçasında qoy olsun gül şən,
Salınan yurdlarda ömür sür, gül şən.
Bir daha peşman olmasın Gülşən,
Əhdini ocağa yenidən bağla.
Doyurmur Xəzəri, Aralı dağlar,
Başı yad əllərdə, aralı dağlar,
Tarixdən utanıb ar alı dağlar,
Bəxtiyar telinə yeni dən bağla.
