Bağışladım
Olan oldu, keçdi deyib,
Səni yenə bagışladım.
Sevdim səni bircə kərə,
Dönə-dönə bağışladım…
Bağışladım səni yenə,
Bağışladım dönə-dönə.
Tanrı səni verən günə,
Sevən günə bağışladım…
Səninlə bir keçdiyimiz,
Dilləndi hər cığır, hər iz.
Bir yerdə and içdiyimiz,
Aya-günə bağışladım…
Doğma əziz bir küçəyə,
Sənsiz ötən hər gecəyə.
Boynu bükük bir çiçəyə,
Solan gülə bağışladım…
Bu dünyada onu bil ki,
Sən eşqimin sonu, ilki.
Səndən başqa kimim var ki?
Səni sənə bağışladım…
Çıx qatar yoluna
Çıx qatar yoluna bahar gələndə,
Mən sənə çiçəkli bahar göndərim.
Vüsal meyvəsindən dada bilmədik,
Sənə hər meyvədən nübar göndərim…
Çıx qatar yoluna payız olanda,
Uçan durnalarla salam yetirim.
Çıx qatar yoluna qaş qaralanda,
O qərib axşami, qəmi itirim.
Çıx qatar yoluna külək əsəndə,
Dağılan saçını darayım sənin.
Çıx qatar yoluna, səni itirsəm,
Bilim ki, mən harda arayım səni.
Çıx qatar yoluna yağış yağanda
Başının üstündə çətir tutaram.
Çıx qatar yoluna, elə özüm də
Mənzilə yetməyən qərib qataram.
Çıx qatar yoluna hər axşam, səhər,
Çıx qatar yoluna, məni qarşıla.
Bəlkə bir ömürlük çəkdi bu səfər,
Mən gələ bilmədim, məni bağışla…
Elə bil dünəndi ömrün baharı
Elə bil dünəndi ömrün baharı,
İndi də payızın yelləri əsir.
Dünyanı təzəcə anlayanda sən
Görürsən, qış gəlib qapını kəsir…
Dünyanın hər dərdi ürəkdən keçir,
Hər ilin payına neçə dağ düşür.
Ömrünün payızı, qışı yetməmiş,
Bir də görürsən ki, saça ağ düşür…
