Gədəbəydədir
İndi inandınmı, a şair könlüm,
Gözəllik dünyası Gədəbəydədir!
Canlara can verir hər çiçək, hər gül,
Bülbülün nəğməsi Gədəbəydədir.
İnan yaraşıqdır bu günkü hala,
Cüyürlər oylağı hər yaşıl tala,
İgid Koroğludan qalmış bir qala,
Mərdlik nişanəsi Gədəbəydədir.
Zamanlar bilmədi Adəmdən bəri
Dağları qaldırar elin hünəri!
Yerin ürəyinin ləli, gövhəri,
Zəngin xəzinəsi Gədəbəydədir.
Ötən əsirlərdən alıram soraq,
Hanı qara damlar,o hisli çıraq?
Dağ təkin saraylar, aynabənd otaq,
İnsan əyləncəsi Gədəbəydədir.
Şınıx yaylaqları, Göyçə baxarı,
Büllur bulaqların sərin axarı,
Qala məskənindən bir az yuxarı,
Sərvlər meşəsi Gədəbəydədir.
İnsan qəlbi olan olsa haralı,
Şəmkir dərəsindən düşməz aralı,
Baxışla danışan ayrım maralı,
Gözəllik şəmsası Gədəbəydədir.
Dağlara baxarsan altdan yuxarı,
Gülləri görünər: qırmızı, sarı,
Moruqlu dolaylar xəstə dərmanı,
Xəstənin loğmanı Gədəbəydədir.
Əzəldən bağlısan ellərə Daşqın,
Qırılmaz sinəndə tellər, a Daşqın,
Bu sözlərin düşsün dillərə, Daşqın,
Dostluq bünövrəsi Gədəbəydədir.
Susmaram
Mən bir qulam, yerim altun, suyum gümüş, özüm ac,
Atam məhkum, Anam sayıl, elim çörəyə möhtac.
Dil yaranıb danışmağa, mən danışa bilmirəm,
Yar sinəmi, aç qəlbimi, ciyər vərəmdir, vərəm !
Koramaltək sürünməkdən, söylə, varmı bir məna?
Nə vaxtacan çörək üçün girim hər alçaq dona?!
Mən insanam, qəlbim vardır, kəskin zəkam, əqlim var.
Bəs deyilmi çiynimizi yağır etdi bu yadlar!
Nə qədər ki, hakimlik var, məhkumluq var, mən varam,
Zülmə qarşı üsyankaram, əzilsəm də, susmaram!
