Bax
İstəyirsən mənlə həmdərd olasan,
Dərdlərimi bilənə bax, bilənə.
Dərdlərim çox qarışıqdır, istəmə,
Anlamaqçün dilinə bax, dilinə.
Hər bir kəsin öz adı var, öz sözü,
Hər sözün də bir əyrisi, bir düzü,
Hər düzün də dərd adlanan bir izi,
Dərd izimi silənə bax, silənə.
Yol gəlmişik bura əlbət içində,
Yarı aşkar, yarı xəlvət içiňdə,
Biri sevgi, biri həsəd içində,
Dərdlərimdən ölənə bax, ölənə.
19.08.2019
Dəyişən deyiləm
Heç vaxt gətirmə ağıla,
Mən dəyişən deyiləm ha…
Göylər uça, yer dağıla,
Mən dəyişən deyiləm ha…
Fələk göyərə, bozara,
Könül qoymaram bazara.
Tutularam min azara,
Mən dəyişən deyiləm ha…
İstəsən doyunca danla,
İstər öldür, istər qanla,
İstər yar ol, məni yanla,
Mən dəyişən deyiləm ha…
Sinəm
Hələ görən yoxdu əhdin üzünü,
Torpağı sevgidən, daşı nur sinəm.
Yenə üz qoyubdu qeybin yoluna,
Məni də aparır, daşınır sinəm.
Qəfəsə yığmışam yağılarımı,
Əl qoysam yer üzü dağlılar imiş.
Ruhuma oxuyum ağılarımı,
Ömür bayatıma əsinir sinəm.
Yenə yaşamağın dəbimi gəlib?
Ağrının köntöyü, çəpimi gəlib?
Bir də qan qusamğın təbimi gəlib?
Məftunluq halımda isinir sinəm.
Bəlkəlik içindən deyilən səs nə,
Cavab olmayıbsa bu səsi kəs… nə,
Qaşları oxşayım, kipriyə bəs nə,
Həsrətdən, hicrandan aşınır sinəm.
Daha kimlik deyil belədən beləm,
Dünyayla bir şərik malım yox böləm.
Əlim ürəyimə çatmayır öləm,
İçdən şirin-şirin qaşınır sinəm.
