DOST ŞEİRİ
Bir şəkil asılıb can otağında,
Sevəni əl vurmur, tozlu saxlayır.
Üzülmüş əlləri sıxıb qoynyna,
Bəsirətə açıq gözlü saxlayır.
Dünya axirətə yedək, calaqdı,
Axırı ayrılıq, təklik, talaqdı…
Xatirə üst-üstə, qalaq-qalaqdı,
Sözdə mətləbini duzlu saxlayır.
Tapılmır ürəkdən halı soranı,
Dirigözlü açır alatoranı…
Yazmır əlləriylə qara-quranı,
Bağlı həqiqəti sözlü saxlayır.
Ruhu cana gəlir könül dağından,
Hələ səda yoxdu yar sorağından…
Üzülmə, Bəxtiyar, tənhalığından,
Allah öz dostunu gizli saxlayır.
10.01.2026
ATEİST ŞAİRƏ
Keçdim min sınaqdan, gəlir davamı,
Dünyanın darlığı dinimdi mənim.
Gözlərdə, qaşlarda, əldə, bənizdə
Allahın yarlığı dinimdi mənim.
İlahi elmini alan ərlərə,
Çox da baş vurmayaq dərin sirrlərə,
Behiştdən günahkar enən yerlərə
Adəmin çarlığı dinimdi mənim.
Bütün aləmlərin yar-yaraşığı,
Hansı tərif desəm olar aşağı.
Allahın ən böyük Nuru, İşığı
Son höccət varlığı dinimdi mənim.
03.01.2022
QAÇDI
(«Məzhəkə»dən)
Kəbleyi demişkən, ölü xortladı,
Canını götürüb gorbagor qaçdı.
Orda neyləmişdi ölü bilmirəm,
Gorbagor əlindən durub gor qaçdı.
Əməli salehlər heç yana qaçmır,
Atəşdə qovrulmur, zəqqumdan içmir.
Gor elə yerdi ki, insan baş açmır,
Kim ordan qaçdısa, amma zor qaçdı.
Gərək hərə çıxsın özünə yiyə,
Anlaya bilə ki, yaranıb niyə.
Bədxah əməlində ilişdi deyə
Bəxtiyar əlindən prok(u)ror qaçdı.
12.12.2022
DEMƏK
(«Məzhəkə»dən)
Əgər tövşüdünsə sən qocalmısan,
Yaşının üstünə yaş gəlib demək.
Qəflətdən oyanıb nəsə duydunsa,
Gecdən ağıl gəlib, baş gəlib demək.
Dünya işlərinin bəddi axarı,
Xeyirdən artıqdı xərci, çıxarı…
Nadan dayandısa səndən yuxarı,
Taleyin, qismətin boş gəlib demək.
Allah hüzuruna quru söz ilə,
Əliboş gedəsən hansı üz ilə?
Nəfəsin görünsə adi göz ilə,
Yığış dar otağa, qış gəlib demək.
Bəxtiyar sınamaz heç vaxt baxtını,
Yerdə yox, axtarır göydə taxtını.
Hakim uzatdısa iclas vaxtını,
Haqqa, ədalətə tuş gəlib demək.
29.11.2022
SALINIB
Gözəllik daşıyan canlar azalıb,
Neçə qol kəsilib, baş salınıbdı.
Ülvilik daşıyan yollar dağılıb,
Hər yolun başına daş salınıbdı.
Nəzər altındadı yol, keçid, cığır,
Qaraçı gününə düşüb hər fağır…
Qocalar ortada açıbdı cıdır,
Növrəs meydanına quş salınıbdı.
Yağı qapısında bütün yetimlər…
Bilmədik nə qalıb, nədi itimlər…
Dörd yandan gətrilən bütün sitəmlər,
Biri əvəzinə beş salınıbdı.
Hamımız dözürük sinə dağına,
Hamımız çatmışıq həsrət çağına.
Gülüstan ölkənin bahar çağına,
Qarının borcuyla qış salınıbdı.
07.12.2021
YEM
Durub nəsə yazsam hamı qaçacaq,
Əhli-hal olanı qəmləməliyəm.
Əza qədirini bilən abidin
Mübarək gözünü nəmləməliyəm.
Yerlərə göylərdən zəhrimar yağır,
Kimi yetim gördüm, kimi də sağır.
Özümə sığındım mən kirik, fağır,
Eşqimi qüdrətlə dəmləməliyəm.
Bəxtiyar, bir az da yaşayaq, görək,
Mənasız yaşamaq nəyimə gərək.
Yazdığım şeirlər verməyir çörək,
Mən özüm şerimi yemləməliyəm
29.11.2021
SORAQ
Düz danışdım olanları,
Yalanların qınağıyam.
Ayrılığa səbr etməkdə,
Məşuqumun sınağıyam.
Dünya Allah nəfəsidi,
Dünya Əlinin səsidi,
Dünya Adəm həvəsidi,
Mən onların qonağıyam.
Seyr yazmaq «sənət» olub,
Kəlmələr çox qələt olub.
Haqq axtarma, qəhət olub,
Mən haqqımın marağıyam.
Çoxdu deyən, çoxdu gülən,
Az tapılır Haqq üçün ölən.
Göylərdən süzülüb gələn
Bir Nidanın sorağıyam.
16.12.2023
TAPMADIM
Çox oxudum nağılları,
Bir əkil-bəkil tapmadım.
Rüzigar yoldu saçımı,
Başımda kəkil tapmadım.
Adi bir söz də yer elər,
Geri baxsan göz bərələr.
Saralıbdı xatirələr,
Solmamış şəkil tapmadım.
Başı sındırma, balası,
Mənə olubdu olası…
Sözümə dayaq olası,
Həqiqi vəkil tapmadım.
27.11.2022
AYıB ŞEİR
Hesabımı sormağa
Fahişədən, çəngidən,
Heç özüm də bilmirəm
Nədi məni ləngidən.
Olmadı gül göndərən,
Bir şirin dil göndərən.
Aləmi tərs döndərərən
Sevgiləri səngidən…
Qazancım quruş oldu,
Hər anım vuruş oldu,
Haqqımda duruş oldu,
Qurtarmaram cəngidən
29.12.2021
DƏYİRMAN
(«Məzhəkə»dən)
Yiyəsi ölüb, merətdi,
Xeyli vaxtdı, dəyirmanın,
Yel vurub yengə oynayır,
Salxaq, laxdı dəyirmanı…
Bu şah da bizə düşmədi,
Saray içi didişmədi…
Bizə un satan düşməndi,
Elin yoxdu dəyirmanı.
Günüm keçir məhkəmədə,
Düşdüm boşa, möhkəmə də…
Daha olub məhkəmə də
Həsənsoxdu dəyirmanı.
26.12.2022
NƏĞMƏ
Dəyib daşa həmişə
Görünən ilk sevgilər.
Heç baxmayıb gözlərə,
Mərdanə dik sevgilər.
Bəxt gəlməyə, ya gələ,
Yaşanar gilə-gilə.
Dönməz çiçəyə, gülə,
Əldə çəlik sevgilər
Payız, zimistan, bahar,
Yoxluqdan bitər, çıxar.
Bəndəni hər gün sıxar,
Birdəfəlik sevgililər.
19.12.2021
AĞLADI
Mən candan ayrı düşəli
Canımdakı can ağladı.
O qədər qərib oldum ki,
Əlimdən hicran ağladı.
Söz yiyəsi söz döndərdi,
Əğyar baxıb göz döndərdi,
Hamı məndən üz döndərdi,
Ortada peyman ağladı.
Rüzigara sinə gərib,
Hər alova, oda girib…
Məntək azad qulu görüb
Ahəstə zindan ağladı.
10.10.2025
