Bağlanıb
Dərdlərimlə,qəmlərimlə vətənəm,
Kürəyimə beş-on zəli bağlanıb.
Qınamayın…söz deməyə qorxmuram,
Söz deyənin dili-əli bağlanıb.
Torpaq deyən, dəli olan qəriblər,
Çənlibeli Qarabağda görüblər.
Həmzələrə bir ip ucu veriblər,
Bu iplərlə neçə dəli bağlanıb.
Gecələri gündüzlərə qatıblar,
Vəkillərim kürsülərdə yatıblar.
İnanmıram… -guya nəsə satıblar,
Hər qapıda ruset kəli bağlanıb.
Cərmələrlə millət elə yüklənib,
Boş ciblərdə ac siçanlar şəklənib.
Dost xidməti «Yox» sözünə köklənib,
Məhəttələm, dildə «Bəli» bağlanıb.
Bu yurd-yuvam, o ocağım, bu közüm,
Bir sutundu, çataqları min düzüm.
Müqəddəs də, deyəmmirəm… əzizim,
Bu sutuna, Əli,Vəli bağlanıb…
Deyə
Şükür, Tanrıya şükür, bu yaz da ayaqdayam,
Alaq təmizləyirəm, pislik artmasın deyə.
Zamənədə dönükdü, ayıq-sayıq olsunlar,
Hərdənbir zəng vururam, dostlar yatmasın deyə.
Çoxları eləbilir, öz kefimdən içirəm…
Gecələr əlli yolla qıl körpüdən keçirəm.
Meydana çağırırlar, ayağımı çəkirəm,
Arxamdakı dəllallar məni satmasın deyə.
Nəsə… hərdən səs gəlir İsrafil tütəyindən,
İsti yuva qurmuşam, yüz arı pətəyindən.
Elə bərk yapışmışam Xudanın ətəyindən,
Özüm batıb gedirəm, dünya batmasın deyə.
Bir şeyə yaramadı, Fironun tilsimləri,
Rəzil etdi yaradan, çox məşhur isimləri.
Gör nə günə qalmışıq…Musanın yetimləri,
Cibə bomba qoyurlar, bəşər artmasın deyə
Yazıqdır oğul-uşaq, ürəyimi yeyirəm,
Hər səhər pencəyimi, kəfən kimi geyirəm.
Hərdənbir doğru deyib… dəli şeytan deyirəm,
Şeytanı aldadıram, ara qatmasın deyə.
Səngərdə böyümüşəm, hədəfdə görünmüşəm.
Yorğan-döşək olmayıb, torpağa bürünmüşəm.
Əyri yolda qaçmayıb, düz yolda sürünmüşəm,
İzimi itirmişəm, əcəl çatmasın deyə.
