Qorxusundan
Həyamdan utanıram, baxıb saça-saqqala,
Ağa — qara demirəm tellərin qorxusundan.
Yaş da o yaş deyil ki, səni sevirəm deyəm,
Eybimə kor olmuşam illərin qorxusundan.
Görürsən ki, arada ayağım yoldan səkir,
Ruhum göyə uçanda cismimi torpaq çəkir.
Saçımda dən üyüdür, başımda kotan əkir,
İndi papaq qoyuram yellərin qorxusundan.
Alan -verən Tanrıdır, o ağlımı almasın,
Yüz yerdə könlüm qalsın, təki gözüm qalmasın.
Dostum, Allah adamı dilə-dişə salmasın,
Dilimi dinc qoymuşam, dillərin qorxusundan.
İnsanı qızıl kimi, arayıram seçirəm.
Bir ünvan axtarıram, min qapıdan keçirəm.
Milyon yolla düşünüb, min ölçüb, bir biçirəm,
Hər kəsə dost demirəm, ellərin qorxusundan.
Ürəyim dilimdədi, kimisə aldatmıram,
Ara tünlük olanda malı-mala qatmıram.
Dilliyə dil vermirəm, şərə əl uzatmıram,
O göylərə uzanan əllərin qorxusundan.
Çaqqallar vəzirli-vəkilli gəlir
Kimə danışasan…
-kimə deyəsən?
Qəm şəxsi olanda, dərd milli gəlir.
Kişini qaldırıb, başının üstə,
Üstümə lotular şəkilli gəlir.
Hesab bu günündü, şor dünənkidir,
Bəh-bəhlə yediyim, balıq kilkidir.
Kasıblar deyirlər, «Pul əl çirkidir»,
Mənə nə yuyulur, nə kirli gəlir.
Qalxırsan adamı, gözlə yıxırlar,
Dinirsən, gözünə bibər* sıxırlar.
Aslanlar meydana yalqız çıxırlar,
Çaqqallar vəzirli-vəkilli gəlir.
Yığılır başıma şans yandıranlar,
Sığınır köksümə , qəlb donduranlar.
İllərdi təpəmdə qoz sındıranlar,
Ölürəm , üstümə əkilli gəlir.
Kürsüdür layaqət, ordendi şərəf,
Kəsilmir kəndirlər, çözülmür kələf.
Allahım!
-Görürsən,…bax, Sənə tərəf,
Cavanşir Qənbərdə fikirli gəlir.
ZƏFƏRİ qeyd edərdim…
Mövzu qismət olanda, söhbət gileydən düşür,
Arvad çörək deyəndə, dizimiz heydən düşür,
Çaynik qalxır havaya, nəlbəki göydən düşür,
-daşa bax ə…
Cibdə manat olmayır, ruhumuz gərilir,
Otururuq kürsüyə, hüceyrələr dirilir.
Kimə toyda qoyulur…
— kimə yasda verilir,
-aşa bax ə…
Heç əlliyə çatmırıq, sol burulur yan əyir…
Əl əsanı tutunca, bei burxulur,alt dəyir.
Adam da var doxsanda, dövlət olmaq istəyir,
-yaşa bax ə…
Yay geridə qalıbdı, payız külək göstərir,
Kasıbı tərpədirsən xəlbir-ələk göstərir,
Dönüb bəyin quşuna, bizə lələk göstərir,
—quşa bax ə…
Ömür ötüb, gün keçib, kəlləni quruduruq,
Sözümüzü yeyirik, hirsimizi uduruq.
Qonşunun çardağında papağı unuduruq,
-huşa bax ə…
Hər yanımız zədədi, zərbə qulaqdan gəlir,
Hədəf qulaqdibidi, soyuq uzaqdan gəlir,
Özü sonra gələcək, boran qabaqdan gəlir,
-qışa bax ə…
Namərdlər arxamıza, dirənib zopa kimi,
Gədələri soxublar, ortaya lopa kimi,
Birinin də bığı yox…qaşları topa kimi,
-qaşa bax ə…
Elə bir zaman gələr, göl quruyar , çay axmaz,
Yan-yörəndə mərd olsa, adam nəsə darıxmaz…
Kişi ürəyə baxar, kişi ayağa baxmaz,
başa bax ə…
Hər şey göz önündədir, gerçəkdə nağıl yoxdu…
«ZƏFƏR»i qeyd edərdik, bir litir çaxır yoxdu,
Baş var dana başıdır, içində ağıl yoxdu,
-xaşa bax ə…
