Mən sənin yolunda düşdüm sevdaya
Süzdüm bulutların üstünə çıxdım,
Vəda təpəsindən üfüqə baxdım,
Zəmzəm bulağının gözündən axdım,
Daldım qəvvas kimi dərin dəryaya,
Mən sənin yolunda düşdüm sevdaya!
Sənin fərağında ömrümü yordum,
Köksümü ötürdüm, boynumu burdum.
Gecə ulduzların seyrinə durdum,
Sordum sorağını günəşə, aya!
Mən sənin yolunda düşdüm sevdaya!
Bağımda başqa bir gül becərmədim,
Yad gül oxşamadım, yad gül dərmədim.
Səndən başqasına könül vermədim,
Arxamı çevirdim, küsdüm dünyaya,
Mən sənin yolunda düşdüm sevdaya!
Olsaydım yanında ömrümü sərib,
Sadiq yarənlərlə qol-qola verib,
Niyə aramıza əsirlər girib,
Gah üsyan eylədim təqvimə, aya!
Mən sənin yolunda düşdüm sevdaya!
Hürriyyətim sənin əsiriniymiş,
Yaşamağa səbəb xətiriniymiş,
Sənə sevdalanmaq nə şiriniymiş!
Razıyam hər dürlü cövr-ü cəfaya,
Mən sənin yolunda düşdüm sevdaya!
Mənə üz verməsən könlüm üzülər,
Qaşlarım çatılar, çehrəm büzülər,
Onda əlim yerdən, göydən üzülər,
De kimə yalvarım salmasan saya?
Mən sənin yolunda düşdüm sevdaya!
