Buxara
Yenə həzin bir axşam…
Dar və şirin küçələr…
Ruhum süzülüp gedir
Tərifi eşsiz anlar…
Kərpicdən divarlara
Həkk olunmuş zamanlar
Sən tarixin özüsən,
Buxara.
Yığın-yığın yapılar…
Tarixdən, estetikdən
Görsün ülviyyətini
Dəm vuranlar etikdən
Nədir səndəki ofsun?
Dünyanın hər yerindən
İnsanlar axın-axın,
Hiss edirsən özünü,
Əcdadına çox yaxın,
Əcdadımın izisən,
Buxara!
Əzanlarla çinləyir
Yüksələn minarələr.
Ruhuma üfüldəyir
Ötələrdən güftələr.
Bağrında keşik çəkən
Nə qədər evliyan var!
Alimlər, evliyalar
Mənəvi sütunların
Misilsiz varlığınla,
Sən islamın sözüsən,
Buxara!
İnsanların mum kimi
Xitabında əriyib.
Kəşf edirəm özümü
Bu engin küçələrdə!
Sakit-sakit yeriyib,
Ruhumun qeyb olduğu
Zülmətdən oyanıram.
Doymaq olmur işvənə —
Doya-doya içirəm.
Sonra yenə yanıram,
Və kəndimdən keçirəm.
Qapıldım cazibənə,
Bir kəs vuruldum sənə.
Ürəyim sənin olsun!
Şəhərlərin gözüsən,
Buxara!
Yalvarıram gəl artıq
Sənsizliyimə dərman,
Ayrılığın qəhəri,
Udub yatdım hər axşam
Açmaq üçün səhəri.
Sənsiz yuxularıma
Yalvarıram, gəl artıq.
Bağışla, sən gələndə
Mən hələ gəlməmişdim.
Aləmlər gəlişinə
Şənlənəndə, güləndə
Xəbərim olmamışdı —
Nə səni bilməmişdim.
Sənin sorağındayam,
Sən də düş sorağıma.
Keçmişə gedəmmirəm —
İndi mənim çağıma
Yalvarıram, gəl artıq.
Yanımda yoxluğun var,
Nə yaxşı ki, varımsan!
Hər yerdə çoxluğun var —
Sevdiyim tək yarımsan!
Çoxa doğulduğun tək
Bu ruhuma doğ artıq!
Zülməti boğduğun tək
Bu içimi gəmirən
Qaranlığı boğ artıq!
Yalvarıram, gəl artıq!
Səni qürbətdə tapdım
Bir baxış donubdu sonku rəsm kimi,
Həsrət gözlərimin çuxur yerində.
Otuz il ömrüm də həvəsim kimi,
Əriyib saatın əqrəblərində.
Vüslət ayrılığın son ucundamı?
Əlindən tutmuşdum — o yadındamı?
Hələ o hənirti, de, ovcundamı?
Bir yadigar saxla! Tut əllərində!
Qədrini gec bildim, ayrıldıq erkən,
Bildim ülfətinə möhtaç qalarkən.
Səni itirmişdim yanımda varkən,
Tapdım uzaqlığın qürbətlərində.
Sanma, sənə gəlsəm yekin pənc olar,
Desəm “həmənkiyəm” — çox iyrənc olar!
Sənin gözlədiyin məndən gənc olar —
O gənc ayrılığın dərinlərində.
Nakam arzuları sona yetirdim,
Sonra xəyallara pənah gətirdim.
Mən səni atmadım, səni itirdim
Ömrüm uzunluqda keçmişlərimdə…
