Firuz Mustafa -Çox dil bilmək –bu, əlbəttə, xoşbəxtlikdir

Neçə gündür dillə bağlı “qırğın” gedir.

Zənnimcə, mübahisə edənlərin böyük əksəriyyəti rus dilinin ölkəmizdə belə intişar etməsinin səbəbini ya bilmir, ya da bunu “gizlədir”.

Uzun –uzadı danışmadan mətləbə keçirəm: əcnəbi dil, doğma dilimizi nə üçün “sıxışdırmaqdadır”?

Səbəb sadədir.

Əvvəla, bu gün hansısa bir gənc, hansısa təşkilata iş üçün müraciət edəndə müdir dayının və ya rəisə xalanın ilk sualı bu olur: “Hansı xarici dili bilirsən? Heç olmasa rus dilini…”

İkincisi, xırda və böyükbuynuzlu məmurların uşaqları çox nadir hallarda milli dildə təhsil alır.

Üçüncüsü, adamlar ona görə əcnəbi dillərdə təhsil alırlar ki, gələcəkdə onlar əcnəbi ölkələrə getsinlər.

…Bax bu problemlər həll olunsa, “milli dil problemi” də həll olunar.

p.s.

Bildiyiniz kimi, mən dilimizlə bağlı mütəmadi olaraq yazılarla çıxış edirəm. Xatırladıram ki, tərifini göyə qaldırdığımız rus dilində 10 mindən artıq türk sözləri və türkizmlər vardır. Amma bizim dilimizdə uzaqbaşı 10 rus sözü ola ya olmaya… Rus dilində A hərfi ilə başlayan bir rus sözü yoxdur.

Yeri gəlmişkən, bizim ailədə hamı milli dildə təhsil alıb. Hətta, ailə üzvlərimizdən biri-nəvəm Aydan beş əcnəbi dildə sərbəst danışır, yazır, oxuyur…

Çox dil bilmək –bu, əlbəttə, xoşbəxtlikdir.

Doğma dilini bilməmək-bu, böyük bədbəxtlikdir.