Təxminən bir ilin söhbətidir. Haradasa, 30 nəfər olardıq, toy axşamına, “Ciyər qonaqlığı”-na yığılmışdıq. Qürbətdə yaşayan bütün azərbaycanlılarda olduğu kimi, söhbətimizin əsas mövzusu Azərbaycan, xalqımızın yaşayış tərzi, adət-ənənələri, mədəniyyəti idi.
“Adətlərimizi, tariximizi unutmamaq üçün Azərbaycan mətbuatını, xüsusən də, ədəbiyyatını oxumaq lazımdır!” fikri söylənəndə, bir nəfər — cavan qayıtdı ki, “Əşi, indi oxunası ədəbiyyat var ki, oxuyasan?” Dedim, var. Yaxşı tanıdığım müasir yazıçılarımızdan bir neçəsinin adını da sadaladım. Həmin cavan: “Məsələn, yazıçı Əlabbas adı çəkildi, nədən yazır, nə yazır?” – dedi. Məndən qabaq, ömrünü şimalın neft buruqlarında keçirən bir ağsaqqalımız cavab verdi:
-Bacıoğlu, Əlabbas xalqımızın mənəviyyatından, dilimizin necə zənginliyindən, başqa xalqlarda görə bilmədiyin yüzlərlə gözəl adətlərimizin varlığından yazır. Xalqımızın insaf və vicdan gözəlliyindən yazır!
Necə gözəl cavab idi! İkicə cümlə böyük bir monoluqu əvəz edirdi.
Cavan qayıtdı ki, “İndi, haradan tapaq Əlabbasın yazdıqlarını?” Ağsaqqal qardaşım dedi: “Gir, “losman.ru”da Əlabbası da tapacaqsan, Azərbaycanımızı da, təmiz ana dilimizi də.”
Mən, əlbəttdə, böyük yazıçılardan biri saydığım Əlabbasın «Köhnə kişi»sindən danışdım, əlavə etdim: “Qardaşoğlu, oxu “Mərənd ölüsü”nü, “Gözəl”i, “Yadigar nəğmə”ni, “Halal qan”ı oxu!”
Bir neçə nəfər elə oradaca smartfonu qurtdalamağa başladılar…
İnkar olunmaz haldır ki, Əlabbasın eyni əsərini dönə-dönə oxumaq olar, yorğunluq bilməzsən. Götürək, müasir ədəbiyyatımızın şah əsərlərindən biri olan “Köhnə kişi”ni. Nə qədər doğmadır əsərin dili, zəngindir! Publisistik dilin bədii dillə bərabərliyi, bəzən, birincinin ikincini üstələməsi Azərbaycan dilimizi sevən hər kəs üçün bir töhvəyə çevrilir.
Əlabbası oxuyanda mən özümü doğma Gədəbəyimdə, qocaman dağların qoynunda yerləşən kəndimdə hiss edirəm, o şirin dövrana qayıdıram. Eləcə də, tovuzlu özünü gözəl Tovuzda, naxçıvanlı Naxçıvanda, laçınlı Laçında hiss edir. Və bir daha güclənir sevgin o elə, obaya. Fəxr edirsən xalqınla, xalqın sadəliyi ilə, dilimizin gözəlliyi ilə. Yazıçı təkcə əsəri sevdirmir oxucuya, dilimizi, xalqımızı sevdirir oxucuya! Bundan ali hansı məqsəd, hansı nəticə ola bilər yazıçıda!?
Əfsuslar, bəzən ədəbi gündəmdə, hər gün, hər həftə KİV-lərdən, ekranlardan nümunə göstərilməyə layiqlər — bu və digər səbəblərdən — qalırlar kənarda, yaşayırlar sakit bir həyat tərzi…
İndi isə, sayta “Köhnə kişi”ni yerləşdirirəm. Bir çox oxucu dostlarım da arzulayıb, özüm də.
Yazıçımızı doğum günü münasibəti ilə təbrik edirəm, uğurlar arzulayıram!
