14 dekabrda Krasnoyarsk şəhərində Yekaterinburqdakı Baş Konsulluğunun rəhbəri vəzifəsini icra edən Şöhrət Mustafayev ilə Krasnoyarsk vilayətində yaşayan Azərbaycan icması üzvlərinin görüşü keçirildi.
Krasnoyarsk Diyarının Regional Azərbaycan Milli-Mədəni Muxtariyyətinin sədr müavini Azər Mustafayev salamlama nitqi ilə çıxış etdi. O, Krasnoyarsk Diyarındakı azərbaycanlılara vətəndaşlıq və əlaqəli məsələlərdə kömək etməkdə uzun illər səmərəli işinə və əməkdaşlığına görə muxtariyyət adından konsula təşəkkür etdi.
Konsul Şöhrət Mustafayev, Rusiya Federasiyası ilə Azərbaycan Respublikası arasında millətlərarası və mədəniyyətlərarası əlaqələrin inkişafı üçün bölgədə görülən işlərin, uğurla həyata keçirilən bir çox layihələrin vacibliyini qeyd etdi.
Diplomatımız burada yaşayan soydaşlarımızın Azərbaycan həqiqətlərinin və zəngin mədəniyyətimizin təbliği istiqamətində gördükləri işlərlə maraqlanaraq, Krasnoyarsk diyarında, həmçinin, onun hüdudlarından kənarda öz mədəniyyət proqramları ilə çıxışlar edən «Odlar Yurdu» Azərbaycan Xalq Ansamblının böyük uğurları ilə tanış olduğunu vurğuladı.
Görüş zamanı vətəndaşları maraqlandıran məsələlər, eləcə də onların üzləşdiyi problemlər müzakirə olundu, vətəndaşların Kimlik vəsiqələrinin qeydiyyatı, repatriasiya üçün şəhadətnamələr, sənədlərin bərpası prosedurları və digər mövzularla bağlı sualları cavablandırıldı. Konsul sualla gəlmiş hər bir soydaşımızı böyük təmkinliklə dinlədi, görüş iştirakçılarının konsulluq və hüquqi aspektlərlə bağlı bütün suallarına ətraflı cavablar verib öz tövsiyəsini söylədi.