SƏNİ
Qurban olum yaradana,
Bənzədibdir gülə səni
Hərəni bir cür yaradıb,
Xəlq eyləyib belə səni.
***
Unutduqmu əhdi-andı?
Bircə, tanrıya bəyandı,
Yollarımız parçalandı,
Kimlər tutdu dilə səni?
***
Qəm-kədərə batıb getdim,
Qaşlarımı çatıb getdim,
Sanki, oda atıb getdim,
Özüm bilə-bilə səni.
***
Kaş, o günlər dönə birdə,
Dözəmmirəm tay bu dərdə,
Neçə arzumla bir yerdə,
Böldüm yadlar ilə səni.
***
Sandım qoçağam, nərəm mən,
Harayına yetərəm mən,
Xan çobandan betərəm mən,
Qurban verdim selə səni.
***
Hər gözəli sevmə, ürək,
Həyat gözəl, ömür gödək,
Ya yaşadar, ya Məcnun tək,
Salar çöldən-çölə səni.
***
Qismət yazılsada haqdan,
Məhərrəm, var olar yoxdan,
Yaş əllini ötüb çoxdan,
Gözləyirəm hələ səni…
