Bilsəm
Yelkənsiz qayığam, qəm dəryasında,
Bu qədər üzməzdim dərinə, bilsəm.
Görərdin kim idim, kimə dönmüşəm,
Bir dəfə gözünə görünə bilsəm…
Mən ki, incimədim taledən, baxtdan,
Gözüm yollardadır, elə o vaxtdan,
Tay taqət də gedib əldən-ayaxdan,
Axtarıb gəzərdim, sürünə bilsəm…
Məhərrəm, sağalmaz ümidsiz xəstə-
Loğmanlar düzülə dəstəbə-dəstə!
Əbədi uyardım, qolların üstə,
İsti nəfəsinə bürünə bilsəm…
Xoş gördük
Yəqin ki, yadında cavan qalmışam,
İndi saç-saqqalı ağam! Xoş gördük!
Şükür, qiyamətə qalmadı hicran,
Hələ yaşıyıram, sağam! Xoş gördük!
Kövrək səsin gözlərimi nəmlədi-
İndən belə kədər nədi, qəm nədi,
Nəsimi tək iki dünya məndədir,
Çətin bu dünyaya sığam! Xoş gördük!
Yenə xatirələr düzüldü ipə,
Buludlar kövrəldi, hey səpə-səpə,
Gah yaz çiçəyinə bürünmüş təpə,
Gah başı dumanlı dağam! Xoş gördük!
Səcdənə gəlmişik, «Hacı Qaraman»,
Qoy qəbul olunsun kəsilən qurban!
El-obama həyan, dostlara həyan,
Ay mənim Sultanım, Ağam, xoş gördük!
Məhərrəm, sinəndə qaldımı dərdin?
Cəbrayılı gördün, yurdunu gördün!
Yaralı çinarın dərdin çəkirdin,
İndi bar-bəhrəli bağam, xoş gördük!
Şükür, qiyamətə qalmadı hicran,
Hələ yaşıyıram, sağam! Xoş gördük!
Məhərrəm Anar. 18.04.24.
Qayıt gəl
Qayıt, inanıram mərhəmətinə,
Nə olub — yaddaşdan silib atanam.
Sənsiz sevincim də su qiymətinə,
Gecə — gündüz dərd — qəm alıb, satanam.
Talehimlə barışsam da, nəhayət,
Sənsiz mənə nəyə gərək bu həyat?
Elə sevdim, Leyli — Məcnun qaldı mat,
Sevmədim ki, saf eşqimdən utanam.
Səni düşünürəm hər gecə, hər gün,
Eşqim əsir düşdü, özüm də sürgün,
Fikrin, yuxumu da salıb didərgin,
İlan vuran yatar.., çətin yatanam…
Xəyallarda gəldim — getdim, elə mən,
Sənsiz ömrü , xırdaladım belə mən,
Ümidlərlə yaşıyıram hələ mən,
Bir yol görsəm, min arzuma çatanam.
Məhərrəm, hələ ki, gəzirəm sağam,
Bəzən az qalıb ki, leysan tək yağam,
Desəm də: «Mən səni unudacağam»,
İnanma, mən sənsiz itib — batanam…
