…Xurafatı, mövhumatı tənqid edəndə Seyid Əzimi məscid qapısında sıxıb öldürənlərin, Sabiri, Hadini, Mirzə Cəlili, Haqverdiyevi söyənlərin xələfləri müasirləşdirdikləri şərləmə metodları, şantaj və iftiralarla rəy formalaşdırmaq istəyirlər ki, guya kim cəhaləti tənqid edirsə, dinin sağlam yaşanmasını tələb edirsə onlar «sionist», «Din düşməni», «Aşura düşmənləri»dirlər. Şərin, böhtanın yekəliyinə bax! … Sosial şəbəkələrdə söyüş söyüb sonra məsciddə «Ya Hüseyn» demək olar?
Bu fikri ilahiyyatçı Tural İrfan deyib.
Müəllif yazır:
«Bəzən Məhərrəm ayında, xüsusən də Aşura mərasimlərində təşkil olunan zərərli, həm din həm də əhali üçün ziyanlı vərdişləri, xurafatı, mövhumatı tənqid edəndə Seyid Əzimi məscid qapısında sıxıb öldürənlərin, Sabiri, Hadini, Mirzə Cəlili, Haqverdiyevi söyənlərin xələfləri müasirləşdirdikləri şərləmə metodları, şantaj və iftiralarla rəy formalaşdırmaq istəyirlər ki, guya kim cəhaləti tənqid edirsə, dinin sağlam yaşanmasını tələb edirsə onlar «sionist», «Din düşməni», «Aşura düşmənləri»dirlər. Şərin, böhtanın yekəliyinə bax! Təəssüf doğuran odur ki, böhtanın, şərin, iftira və söyüşün əleyhinə olan bir dinin mənsubu kimi özlərini təqdim edən bu güruh sonra İmam Hüseynin pak adını hansı üzlə şərdən, söyüşdən, böhtandan, şantajdan, qiybətdən murdarlanmış ağızlarında dilə gətirirlər?
Heç kəs dinin, mənəviyyatın, əxlaqın, Əhli Beyti yad etməyin, onların yolunda getməyin əleyhinə deyil. Əksinə onların yolunu saxtalaşdırıb siyasi, xarici maraqlara alət edilməsinin, təhrif olunmasının əleyhinədir əksəriyyət. Sosial şəbəkələrdə söyüş söyüb sonra məsciddə «Ya Hüseyn» demək olar? Ziyalıları, ictimai xadimləri, maarifçiləri trol dəstələrinə təhqir etdirib sonra da sinə döyüb özünü «Əhli-Beyt aşiqi» adlandırmaq olar?
Bu böhtanı deyənlər məgər görmürlər ki, ölkədə nə qədər məscid tikilir? Dini qurumlara, məscidlərə ən yüksək səviyyədə şərait yaradılıb? Bu şərait din pərdəsi altında saxtakarlıq etmək, xalqın həmrəyliyini müxtəlif elementlərlə pozmağa çalışmaq, xurafatı, təfriqəni din adı ilə camaata sırımaq üçün yaradılmayıb. Sağlam mədəni dəyərləri, mənəviyyatı, dini olduğu kimi yaşamaq və yaşatmaq üçün, xalqa, dövlətə faydalı olmaq üçün yaradılıb.
Sanki biri bünövrəsiz hündür mərtəbəli ev tikir. Ziyalılar, mütəxəssislər, ağsaqqallar gəlib etiraz edir, evin uçacağını bildirirlər, hətta dağıntı zamanı qonşulara, başqalarına da zərər dəyəcəyini deyirlər. Layihə əsasında, sağlam şəkildə ev tikməyi tövsiyyə edirlər. Adam neyləyir? Nəsihətə, həqiqətə qulaq asmaq əvəzinə min cürə şər, böhtan, şantaj, söyüş və şivənlə hay qopardır ki, filankəslər mənə ev tikməyə mane olur, paxıllıq edirlər, ümumiyyətlə ev ənənəsini ləğv etmək istəyirlər ki, çadırda yaşayım…
Eynən Aşura ilə bağlı da belədir. Baş verən mənfi halları, yanlış ənənəyə daxil olan elementləri, xurafatı tənqid edənləri şərləyirlər ki, bunlar Aşuranın, Məhərrəmin hətta İmam Hüseynin əleyhinədirlər. Tamamilə şər və həyasıslıqla atılmış böhtandır.
Uşaqların Aşurada tədbirlərə aparılması belə halda necə doğru ola bilər ki, artıq bu mərasimlər öz mahiyyətini itirir? Kiməsə güc nümayişi, etiraz əlaməti niyyəti daşıyan, insan şüuruna yalnız qılınc, qan, matəm, etiraz, üsyan, qoyam təəssüratı daşıyan, xurafatlarla zənginləşdirilmiş belə yığıncaqlardan uşaqlar nə götürə bilər? Əgər dini tədbirlər, məclislər İslama, Peyğəmbər ənənəsinə, milli ənənə və dəyərlərimizə uyğun şəkildə təşkil olunarsa, sakit, normal, özünə xəsarət yetirmədən, səs-küy yaratmadan, asayişi pozmadan, nəsihətlər, ibrətlər söylənən bir məclisə dönüşərsə, heç bir siyasi, ideoloji üsyankarlıq xarakteri daşımazsa nəinki uşaqları, lap çağaları da aparmaq olar. Lakin təəssüf olsun ki, bu belə deyil. Getdikcə də bu mərasimləri qərəz nümayişinə, sanki nəyisə baykot, kiməsə etiraz nostalgiyasında kökləyirlər. Din din kimi yaşanmalıdır. Dini siyasətə, kənar maraqlara alət etmək, manipulyasiya edərək fərqli məqsədlərə alət etmək həm dinə, həm də dövlətə xəyanətdir.
Bu gün xurafatı, mövhumatı, ekstremizmi, məzhəbçiliyi ona görə tənqid edirik ki, din sağlam yaşasın. Dinimizi tolerantlığımızı bal şərbətində zəhərləməsinlər. Ona görə də zəki, ziya sahibi insanlar ağı qaradan seçərək dinimizin gələcək nəsillərə sağlam ötürülməsi üçün səylərini əsirgəməməlidir.»
