Səninlə
Hansısa döngədə ilişib Zaman,
Səbrimi sınağa çəkir səninlə,
Deyəsən, səninlə sözləşib Zaman,
Şübhəni qəlbimə əkir səninlə!
Vədəni görüşdə yaşamaq olmur,
Zamana nə deyim, oxşamaq olmur,
Yük deyil — götürüb daşımaq olmur,
Səbrimi sınağa çəkir səninlə!
Səninlə əvvəldən sözləşib zaman,
Qırışıb, səninlə gözləşib zaman,
Qorxuram mənimlə üzləşib zaman,
Səbrimi sınağa çəkir səninlə!
Görüşdə kök atıb bitmişəm axı,
Bəlkələr əlində itmişəm axı,
O yolu yüz kərə getmişəm axı,
Səbrimi sınağa çəkir səninlə!
Sənin xətrinə
İncitdim Dünyanı, ay ömrüm-günüm,
Üzünə ağ oldum Sənin xətrinə!
Taleh yollarında sirli bir düyün,
Açılmaz bağ oldum sənin xətrinə!
Qorxulu nağılla yaşadı dünyam,
Bəlkə də sınağı aşardı dünyam,
Sevgisiz yolunu çaşardı dünyam,
Aşılmaz Dağ oldum Sənin xətrinə!
İnadım, inamım daşdan nəkəzdi,
Dərdini bələkdə, beşikdə əzdi,
Sən çatan oçağın odu sönməzdi,
Dünyana tağ oldum Sənin xətrinə!
Dünyanın doqqazında
(Ustadım YUSİF KAMALA)
Bu Dünyanın gözü qançır,
Yumur ağzın,qanla açır,
Can ürpədir,ruhum qaçır,
Ötür Tanrım, ötü məni
bu dünyanın doqqazından!
Qəliblərə necə sığaq,
Büt əlini necə sıxaq,
Bu qulluğu necə yıxaq?
götür Tanrım, götür məni,
bu dünyanın doqqazından!
Asır bizi, kəsir bizi,
Eləyibdir həsir bizi,
İçimizdə əsir bizi,…
Sökür Tanrım, sökür məni!
Bu dünyanın doqqazında…
