Keçmir
Hələ «çəkic»lərdə ilişib qalıb,
Çoxu «oraq»lardan o yana keçmir.
Millət ağ günlərin arzusundadı,
O da soraqlardan o yana keçmir.
Bircə gün ayılmır səsimə karlar,
Qoy yağsın başıma, qoy yağsın, qarlar,
Bu ətli şüarlar, yağlı şüarlar,
Dəfə-daraqlardan o yana keçmir.
Hərə bu dünyada boyu qədərdi,
Nə boyda yaşasaq sonu hədərdi,
Mənim ürəyimin ağrısı, dərdi,
Bu ağ varaqlardan o yana keçmir.
Bəllidi ünvanlar, bəllidi postlar,
Gəlin aldatmayaq məclisi dostlar,
Deyilən sağlıqlar, içilən tostlar,
Ucuz araqlardan o yana keçmir.
Çəkilmir gözümün dumanı-sisi,
Efirdən yüz dəfə böyürsün İsi,
Bu gün vətən eşqi, vətən sevgisi,
Şəxsi maraqlardan o yana keçmir.
Çiçəklər dilimi bilsəydilər
Adamlar heç,
çiçəklər dilimi bilsəydilər,
Hamısı sevə-sevə başıma and içərdi.
Sinəmdə yer verərdim bütün kimsəsizlərə,
Bütün isti yuvalar ürəyimə köçərdi.
Sağ olsun hərə bir yol könlümə dağ gətirdi,
Ağrılar şirin-şirin içimdə tağ gətirdi,
Oturub gözləməkdən gözlərim ağ gətirdi,
Nə könlüm kama yetdi, nə bir arzum cücərdi.
Mən hamını sevirdim axı, Allahcasına,
Baxmadan libasına, puluna- axçasına,
Bu xaraba dünyada ömrümün bağçasına,
Kimi bağban qoydumsa tikan əkdi-becərdi.
Ötüb keçirdi adım neçə-neçə tay-tuşu,
Onda itirməmişdim bu qədər ağlı-huşu,
Otuzumda başımdan yan ötdü şahlıq quşu,
Ağlına batsa idi, yəqin məni seçərdi.
Saldım üzü yoxuşa ürəyimdən bac aldım,
Taledən buna görə nə rütbə, nə tac aldım,
Başımı hər məqamda dik tutmağı bacardım,
Əysəydim əlbəttə ki, hər qapıdan keçərdi.
Doğum günün mübarək İstiqlal Günəşi
Ola bilməz bu miqyasda hər kişi,
Böyük kişi, ulu kişi, ər kişi,
Köhnəlməyən təzə kişi-tər kişi,
Unudulmur, düşür yadə, günüdür.
Məmmədəmin Rəsulzadə günüdür.
Sözüm budu, sözüm budu güruha,
Acı nəfəs toxunammaz bu ruha,
Qəlbimizdə uca durur o düha,
Tariximin əsilzadə günüdür,
Məmmədəmin Rəsulzadə günüdür.
Yetə bildik həqiqətin kökünə,
Başqa hansı fikir olsun o günə,
Bir qocaman şükür olsun o günə,
Yurdun, elin tam azadə günüdür,
Məmmədəmin Rəsulzadə günüdür.
Xəbisləri tumurcuqda soldurun,
Olmazları zəhmət çəkin, oldurun,
Sevgi ilə, nəşə ilə doldurun,
Ürəklərin bu gün, badə günüdür,
Məmmədəmin Rəsulzadə günüdür.
Yüz olsa da, min olsa da qanlısı,
Məhz bu gündü günlərin ən canlısı,
Qürurlusu, şərəflisi-şanlısı,
Əzəmətli, fövqəladə günüdür,
Məmmədəmin Rəsulzadə günüdür.
Davam edib, davam edir böylə də,
Havalanıb gedə billəm göylə də..
Gərək yoxdu təmtərağa öylə də,
Həm mürəkkəb, həm də sadə günüdür,
Məmmədəmin Rəsulzadə günüdür.
Olsa belə 70 illik aldanış,
Pas tutmadı yaratdığı altın iş,
İl hamısı 300,üstə 60,
Saat-saat,radə-radə günüdür,
Məmmədəmin Rəsulzadə günüdür.
