Əksər insanlar üçün xəzinə tapmaq xoş bir təsadüfdür. Lakin itirilmiş xəzinələri məqsədyönlü şəkildə axtaranlar da var. Onlar həqiqətən dəyərli bir şey tapmaq şansı üçün öz pullarını riskə atmağa hazırdırlar. Supercar Blondie yazır ki, Kaliforniyalı bir şəxs tərk edilmiş bir dəniz yük konteyneri alıb, içindəkiləri alış-verişin özündən xeyli dəyərli olduğu ortaya çıxıb.
Kaliforniyalı (ABŞ) YouTube yayımçısı Brent Rivera və dostları Los-Anceles limanı yaxınlığında sahilə çıxmış tərk edilmiş dəniz yük konteynerini 20 min dollara alıblar. Fırtınadan sonra sahilə sürükləndiyi ehtimal edilən konteynerin alınmasından əvvəl onun sahibi ilə hüquqi məsələlər həll edilib.
Konteynerin qapıları açıldıqda isə alıcıları böyük sürpriz gözləyib. İçəridən təxminən 50 min dollar dəyərində, demək olar ki, zədəsiz Polaris Slingshot avtomobili, insansı rəqs və kunq-fu robotu, robot it və elektrikli sörf taxtası tapılıb.
Bundan başqa, su keçirməyən çoxsaylı iPhone və MacBook kompüterləri, PlayStation 5 oyun konsolları, Louis Vuitton gün eynəkləri və orijinal qablaşdırmasında Pokémon kartları da konteynerdən çıxıb.
Lakin tapılanlar bununla bitməyib. Konteynerdə boş taxta tabut, hava fişəngləri və canlı zəhərli ilanların olduğu qutu da aşkarlanıb.
Məlumata görə, yalnız Polaris Slingshot avtomobilinin dəyəri konteynerə ödənilən məbləğin iki dəfədən çoxunu qarşılayıb. Beləliklə, 20 min dollarlıq riskli alış gözlənilmədən böyük qazanc gətirən sərmayəyə çevrilib.
Belə alış-veriş əsl qumar oyunudur, çünki içəridə nə olduğunu heç kim bilmirdi. «Bu konteynerin dəyəri milyonlarla dollar ola bilər. Amma içəridəki hər şey zədələnərsə, heç bir dəyəri olmaya bilər».- Rivera dedi.
Oxşar maraqlı hadisə Avstriyanın Vyana şəhərində baş verib. Villanın zirzəmisində boru təmiri aparan santexnik divarın içərisinə yerləşdirilmiş metal sandıq aşkarlayıb.
Sandığın içindən İkinci Dünya müharibəsindən əvvəlki dövrə aid, üzərində Volfqanq Amadey Motsartın təsviri olan təxminən 30 kiloqramlıq qızıl sikkələr çıxıb.
