Rast gəldik
Getdikcə daha sərt,acı rəftarlara rast gəldik,
Bizdən söz edən, can sıxan əş’arlara rast gəldik.
Susmuş qəti, haqdan deməyən lalları çox gördük,
Haqqın səsini duymayacaq karlara rast gəldik.
Kim kimdir axı, hər dəfə təsdiq olunub, bildik,
Qeyrətsizə bir növ yaxın oxşarlara rast gəldik.
Çaqqalara meydan verilib, gözdən itib hər kəs,
Qurda xox edən bir sürü kaftarlara rast gəldik.
Cəlladlara yaltaqlıq edən, hər cürə oğraş var,
Bənzərsiz olan qəhbə tərəfdarlara rast gəldik.
Biz hansı günah sahibiyik, ey böyük Allahım?
Vicdan tanımaz «bicbala» qəddarlara rast gəldik.
Hər şey qarışıb, mənsəb itib, dindən əsər yoxdur,
Gör bir necə şeytan kimi dindarlara rast gəldik.
Ceyhun, sığın Allaha təvəkkül elə hər gün sən,
Məqsədləri, niyyətləri murdarlara rast gəldik.
Düşsəm də çox dərdi-sərə
Mən nahağı, yalan sözü,
Yaxın gedib götürmədim.
Yalanları doğru kimi,
Bir kiməsə ötürmədim.
Nə olmadım xain-alçaq,
Nə olmadım zülmə yaltaq,
Yaxşılıqlar etdim, ancaq,
Heç dilimə gətirmədim.
Düşsəm də çox dərdi-sərə,
Olmuşam təslim qədərə,
Yıxılsam da əlli kərə,
Duruşumu itirmədim.
Etsəm belə gileyləri,
Nuş etsəm də çox meyləri,
Özüm bitdim, çox şeyləri,
Nöqtə qoyub, bitirmədim.
Kül oldum, yığdım közümü,
Həyat açdı kor gözümü,
Bir vaxt gəldi, mən özümü,
Kimə gəldi yetirmədim.
