Ehtiyacı var
Dərd əkib, dərd doğan adamlar üçün,
Nə ata, nə ana ehtiyacı var.
İndi bu torpağın, indi bu yurdun,
Təzə bir romana ehtiyacı var.
Yoxdu dərdimizi hesaba vuran,
Havadan iy çəkir yerindən duran.
Elə qurubdu ki, nizamı, quran.
Yaxşının yamana ehtiyacı var.
Silaha çatmayan əlim utancaq.
Qələmi ox kimi hayana sancaq.
Hər işi düzəlib millətin ancaq,
Qopuza,kamana ehtiyacı var.
Çıxdı zəhmətimiz hər zaman kirə,
Salam göndərirəm efirdən şirə.
Bu xalqın seyidə, ocağa, pirə,
Mollaya, şamana ehtiyacı var.
Hardadı qızıldan yaxası zər gün,
Cüt günü böhtandı, tək günü şər gün,
Eşşək eşşəkdi ki, onun da hər gün,
Bir ovuc samana ehtiyacı var.
Beş-altı misrayla uyardım şahı,
Nə vaxt yerdə qalıb məzlumun ahı.
İtin yiyəsi var, qurdun allahı,
Hər şeyin zamana ehtiyacı var.
Sancır
Düzübsünüz başına şüşə qırıqlarını,
Yolboyu çəkdiyiniz barı da məni sancır.
Get-gedə kirpiləşir, hər şeyiniz, sevgilim,
Bağınızın heyvası, narı da məni sancır.
Axmaq bir fikir yenə başımda yüz tağ atıb..
Bilsəydim siz tərəfə sürməzdim heç, ağ atı,
Allah kəssin sən gəzən, o, bağı,o, bağatı,
Gülü də məni sancır, xarı da məni sancır.
Batırdım qayığımı dəryanın lil yerinə,
Gün keçir ay yerinə, ay keçir il yerinə,
İlanmı saxlayırsan, ağzında dil yerinə,
İki kəlmə deməmiş yarıda, məni sancır.
İgid yazıq neyləsin solu-sağı kəsilib,
Qaradan qarası yox, ağdan ağı kəsilib,
Siz tərəfdə nə varsa mənə yağı kəsilib,
Küçənizdən keçəndə arı da məni sancır.
Sanki mən qaytarmışam cavanlıqda «hə» sini,
Heç cürə kəsmək olmur qışqıranda səsini,
Tolazlayır dalımca həyət süpürgəsini,
Əldən — ayaqdan düşən qarı da məni sancır.
Çırtıq çalıb oynama, içimdə şənlik deyil,
Həlli çətin şeylərin heç biri tənlik deyil,
Ağdan söhbət açmıram, ağ çoxdan mənlik deyil,
Qoşulubdu qaraya, sarı da məni sancır.
Bir ömrün zülmətində, əridi getdi mumum,
Belə də olmur axı, nə olsa gözmü yumum,
Mən indi bu dünyada insafı kimdən umum,
Bəndə də məni sancır, Tanrı da məni sancır.
