KÖNÜLSÜZ
Onsuz gələcəksən dəlixanaya,
İstər könüllü gəl, istər könülsüz.
Yar istər əllərin bata xınaya,
Havalı olmağın istər, könülsüz.
Daha naz etməyə qalmayıbdı yer,
Üzüyola olmaq gərəkir indi.
Münkəri, Nəkiri buradaca gör,
Quyun qazılıbsa, bil ki, dərindi.
Bir erkək dəvəni dişi eyləyən,
Bir elat, bir ulus içindəsən sən.
Ala qarğa bala çıxartmaz, eynən,
Yumurtamı qoyub kürkə düşürsən?!.
Maraqlı aləmdi, məni qınayan,
Özünü hər zaman göstər könülsüz.
Onsuz gələcəksən dəlixanaya,
İstər könüllü gəl, istər könülsüz.
17.07.2026
HARAYA GƏLDİK
Ömrü keçirmişəm nələr, nələrdən,
Nələri görmüşəm, tamam dəyişib.
Dönüb boylananda xatirələrdən,
A qardaş, büsbütün dünyam dəyişib.
Allah, biz haradan hayara gəldik?!
Sevgilər qoyuldu vitrinə daha,
Azad bazarlar da bərbad olubdu.
Fərq etməz satılır ucuz, ya baha,
Ümidlər ölübdü, arzu solubdu.
Allah, biz haradan haraya gəldik?!
Daşlaşıb ürəklər, pozulub əhdlər,
Qardaş da qardaşa çıxıbdı yağı.
Sərxoşlar dilindən oxunur əqdlər,
İzdivac yaradır şeytani çağı,
Allah, biz haradan haraya gəldik?!
Gözlər pərdələnib, qulaq kipləşib,
Dillərə vurulub qurğuşun möhür.
Təbəssüm yerində üzlər kirləşib,
Yalan irişmələr zəhərdi, zəhər,
Allah, biz haradan haraya gəldik?!
Alimi yalançı, abidi qorxaq,
Məmuru qaniçən zamana gəldik
Sənin pənahından qaçırıq uzaq,
Zülmətdə amansız aman gəldik,
Allah, biz haradan haraya gəldik?!
26.04.2026
ÖZÜM ÜÇÜN AĞI
Az qalıb, köçəcəm mən də dünyadan,
Onda deyəcəksiz dəvə, filiydi.
Məzluma simsardı, yetimə həmdəm,
Zalımın önündə haqqın diliydi.
Hesabı qatdılar hərə bir cürə,
Sürtülmüş verildi qız kimi ərə…
Güllə atılanda qəpiyə görə,
Atəşi durduran sülhün əliydi.
Özünə dost seçər fərşi, mələyi,
Hər gün ram edərdi şeytan kələyi…
Səbri tükənəndə üsyan eyləyib,
Qızanda beyini qəzəb yeliydi
Vaxtında oldunuz siz kor, həm də kar,
Girməkdə, susmaqda idiz peşəkar.
Bu qərib deyirdi sözü aşikar,
Axınla düz getmirdi, dönməz dəliydi.
Heç nə yox olmayıb, heç nə itməyib,
Aləmi dəyişib, uzaq getməyib…
Allah xeyrini qəbul etməyib,
Qurban verdiyiniz həsrət gülüydü.
25.04.2026
BİR GÜNƏ YAZILMIŞ ŞEİR
Saxta təbəssümə inanan olmam,
Bir dəfə ürəkdən gülmədin axı.
Nömrəni dəyişib gizlənə bildin,
Özünü gizlədə bilmədin axı.
Hələ ki, gedəsi yoxdu bir yerin,
Yerin üzərində, göy altındasan.
Gəlməyi bilmədik asan, ya çətin,
Getməyi bilirik olmayıb asan.
Özündən çıxmısan, özünə bir də,
Dönüşü gözləmə məşhərə qədər.
Özünü çox yorma, düşmüsən dərdə,
Özünü gizlətmə gözlərdən hədər.
Daha gizlənməyə yer saxlanmayıb,
Fısıllıq meşə yox, sahibsiz zağa,
Dəniz kənarında bir qarış yer yox.
Vəkillik qalmayıb, divan qalmayıb,
Ha yana baxırsan baş üstə ağa.
23.04.2026
OLA
Olasan sən Əli-Vəli aşından,
Sənə qismət olan quru yurd ola.
Çalışıb çapdığın bir qara quruş,
Əlində, ovcunda qalan gərd ola.
Yüklənib gələsən çul bazarından,
Şəllənib qalasan söz azarından…
Qaça bilməyəsən it nəzərindən,
Üstünə bərələn gözlər dörd ola.
Səhrada gələsən tuş yağışlara,
Otrumda durmağa, yır-yığışlara…
Düşəsən heç nədən qan-qarğışlara,
Heç nə olmasa da düşmən mərd ola.
06.09.2026
Cavanşir Qənbər Qağaya nəzirə
Yapışaydıq yüyənindən ağ atın,
Razılığa ömür verrəm on qatın…
Ahənginə cinas tutduq həyatın,
Təzadları çox kalandı, boldu, bol.
Zülmətlərdən əzab çəkib ağlayan,
Peymanını qərinələr saxlayan,
Ərşi, kürşü bir-birinə bağlayan
Həqiqəti bəyan edən dildi, dil.
Yoxdu bizim kimi haray qoparan,
Eşitməyir nə dağ bizi, nə aran.
Aşiqləri Haqq dərgaha aparan
Yoldu Qağa, yoldu Lələ, yoldu, yol.
Dərd əlindən sinəmizi etdik dəf,
Eşq yolunda ürək oldu tək hədəf.
Mənasızdır bəzək-düzək, hər sədəf,
Mərifətdən bitən kəlam güldü, gül.
17.08.2026
OLUB
Aləmə açılan sözüm, söhbətim,
Kərəmin köksündə yanan saz olub.
Yerdə sevgilərin mayası ancaq,
Ürək təranəsi, xoş avaz olub.
Nur yağır gördüm ki, ağ birçəklərə,
Oxşayır həqiqət tər çiçəklərə.
Ayrılıb xəyaldan gerçəkliklərə
Uzanan dualar pak pərvaz olub.
Şirindi mətləbi imanın, dinin,
Həsrəti yaşadır gözlərdə əmin.
Dünyaya bağlanan elm aliminin,
Məntiqi, iqrarı çox dayaz olub.
Adı ömür olan mənasız köçü,
Anlayan ağlayır hey için-için…
Edə biləcəyim vüsalım üçün,
Gücüm, qüdrətimdən azdan az olub.
Özümə xəlvətdə yer eləmişəm,
Dünyanı başıma dar eləmişəm.
Yetimlik içində baş girləmişəm,
Nicatım xəlvətdə sidq-niyaz olub.
Tanrı sevənlərin ələmi yoxmuş,
Təzə Məcnunların Sənəmi yoxmuş,
«Mənəm» deyənlərin «mənəmi» yoxmuş,
Bu yeni düzəmə şər əvəz olub.
12.04.2026
ACI ŞEİR
Niyə dirənmişsən üzümə, zalım,
Pisliklər edirsən qardaşın üçün.
Qəlbinə yolları yağmamalısan,
Heç üzün gülübmü yoldaşın üçün.
Çox arxa çevirmə həqiqətlərə,
Qoşuldun şeytani siyasətlərə.
Burnunu soxursan pir söhbətlərə,
Bunlar deyil axı kal başın üçün
Dünyada olmayıb heç bir şey hədər,
Gözünə görünmür külli hikmətlər.
Batmışsan haramda xirtdəyə qədər,
Kapital yığırsan son yaşın üçün.
Ulus eşələnir xarabalıqda,..
İntizar hallıyam hər toranlıqda…
Mən Nur qoruyuram bu qaranlıqda,
Sən od aparırsan atəşin üçün.
28.02.2026
