Yerinə
Dözmüşük…
-dözürük…
-dözəcəyikdə…
Yaman düz oturub bu paz yerinə.
Fərqi yox, eh nədən olursa-olsun,
Yeyirik yumruğu, qapaz yerinə.
Bəxtimiz yaralı qaçaq kimidir,
Komamız minnətdi qucaq kimidir,
Ömrümüz qəzalı, uçaq kimidir,
Sükanı oturmur taraz yerinə.
Gözüm böyüyədir, sözüm uşağa,
Qoymayın bizləri baş qaşımağa.
Elə həvəsliyik daş daşımağa,
Arzu et… çatacaq, kamaz yerinə.
Hərdənbir baxıram, dağda duman var,
Bir karvan çəkməyə hələ güman var,
O tayda it oğlu bir Koçaryan var,
Çətin ki, qayıda yeraz yerinə.
Bir daha düşünün, anlayın bilin,
Vallah, içindədir dərdi bu elin.
Deyirəm, peyğənbər olsaydı Lenin,
Bir əncam çəkərdi, o daz yerinə.
İlahi bir eşq var, mən bunu duydum,
Eli sevə-sevə yurda can qoydum.
Çoxdan qurumuşdum,
-çoxdan yoxuydum,
Kaş, özüm olaydım Araz yerinə.
