Səssizliyə toxunma
Səssizliyə toxunma — içimdə gecələr var,
Bir az da yaxınlaşsan, ulduzlar töküləcək.
Bir az da qurcalasan, ağlayacaq dörd divar,
Küçələr ayağımın altından söküləcək.
Əlini çək gecəmdən, gecələr məhrəmimdir,
Qoy qaranlıq gizlətsin gözlərimdə olanı.
Gecələr hisslərimin şahlandığı dəmimdir,
Bir mən, bir Allah bilir ürəyimə dolanı.
Həsrətli xatirələr səndən mənə qalanlar,
Tək təsəlli qaynağı, həzin bir qürbət payı.
Gözlərində min illik, bakirə bir kədər var,
Kim baxdı o gözlərə, söylə, məndən savayı?
Mən səni sevməmişdim ötəri həvəs kimi,
Məhəbbət sənin üçün adi oyuncaqdımı?
İndi nakam sevginlə ovudursan bəs kimi?
Sevgisiz bir ürəyə ürək vermək haqdımı?!
İndi get… amma məndən alma xatirəmizi,
Qoy xəyalın içimdə bir az da nəfəs alsın.
Tale bölüb ayırdı bir yana hərəmizi,
Sənin payın sənindi, mənimki məndə qalsın.
Səssizliyə toxunma… mənə sirdaş olmadın,
Hicranlı gecələrdə öz əlim, öz başımdı.
Baxma, vəfasız oldun, yola yoldaş olmadın,
Amma səndən qalanlar ömür gün yoldaşımdı.
Son axşamın astanasında
Dönülməz bir axşamın sanki kənarındayam,
Gecikmiş bir karvanın son yolçusu kimiyəm.
Neçə bahar kül olmuş və son baharımdayam,
Çəkirəm hesabımı, özümün hakimiyəm.
Nə geri dönən yol var, nə çağıran bir səhər,
Saatlar yorğun-yorğun tıqqıldadır divarı.
Ömür dedikləri də bir ovuc külmüş məgər,
Taleyim səpələyib əsən küləyə sarı.
Bir məchul qapı varmış, sonrası əbədiyyət,
Nə açarı bilinmir, nə bəllidir kandarı,
Arxasında naməlum, yeni bir mədəniyyət,
Önümdə bəlkə ömrün axırıncı baharı.
Nə daha təsəlliyə sığınmağın yeri yox,
Nə “yenə qayıdaram” yalanına inanmam.
Əgər son gecədirsə, irəli var, geri yox,
Min dəfə aldanmışam, bu son dəmdə aldanmam.
Qoy sonuncu bağçada güllər açsın bir başqa,
Al-qırmızı yayılsın qürubum üfüqlərə.
Ya xəstə ürəyinin rəngi boyansın eşqə,
Ya səssizcə uçaram tuba açan yerlərə.
Ölümü gözləyərək qarşılamaq iş deyil,
Onu gözəl yaşayıb məğlub eləmək olar.
Ürək son ana qədər sevirsə, vərdiş deyil,
Ölümdən sonraya da ömür əkləmək olar.
Əgər həqiqətən də açılmasa sabahım,
Bu gecəni sonuncu möcüzəm biləcəyəm.
Tək ölənə qədər yox, ey sevgili Allahım,
Ölərkən və sonra da tək Səni sevəcəyəm.
