Həmişə ehtiyac içində yaşamış Niderlandlı rəssam Vinsent van Qoq həmişə hansısa bir kiçik məbləğə — təxminən bir neçə min franka — sahib olmağı arzulayırdı ki, bu da ona rahatlıqla işləməyə imkan verərdi. Lakin o, bütün ömrü boyu cəmi bircə əsərini — «Qırmızı üzüm bağı»nı — vur-tut 400 franka sata bildi.
Rəssamın ölümündən iyirmi il sonra «Overdə mənzərə» və «Qırmızı üzüm bağı» əsərləri tanınmış rus incəsənət himayədarı İ. A. Morozov tərəfindən 33 000 qızıl rubla satın alındı.
Bu hadisə rəssamın sağlığında olsaydı, bu pulun kiçik bir hissəsi 19-cu əsrin ən böyük rəssamlarından biri olan Van Qoqun ömrünü və yaradıcılıq fəaliyyətini daha uzun illər uzatmağa kifayət edərdi.
1970-ci illərdən bəri Vinsent van Qoq dünyanın ən bahalı rəssamlarından biri olub və onun əsərlərinin qiyməti artmaqda davam edir.
1987-ci il noyabrın 11-də Van Qoqun «İrislər» (Irises) adlı əsəri «Sotheby’s» hərracında o dövr üçün rekord məbləğə — 53,9 milyon dollara satıldı. İki il sonra, 1990-cı ildə isə «Doktor Qaşenin portreti» (Portrait of Dr. Gachet) adlı tablo 82,5 milyon dollara satılaraq Van Qoqun ən bahalı əsərinə çevrildi.
Yüksək qiymətlərə baxmayaraq, onun əsərlərinin sahibləri kolleksiyaları ilə vidalaşmağa, böyük rəssamın əldə olan əsərlərini satışa çıxarmağa tələsmirlər: son iyirmi il ərzində bazarda rəssamın cəmi üç rəsm əsəri və bir qrafik işi peyda olub.
Rəssamın əsərlərindən ibarət ən böyük kolleksiya Amsterdamdakı Van Qoq Muzeyində, digər əhəmiyyətli bir kolleksiya isə Niderlandın Otterlo şəhərindəki Kröller-Müller Muzeyində saxlanılır.
