ÇƏK GÖRÜM
Qanmayanın qananından çoxdursa
Qoca dünya, çək bu dərdi, çək görüm.
Yanmayanın yananından çoxdursa,
Qoca dünya, çək bu dərdi, çək görüm.
Elə dərd var döz deməklə dözülməz,
Tut ucundan «çöz» deməklə çözülməz.
Arva ilə, pərsəng ilə ölçülməz
Qoca dünya, çək bu dərdi, çək görüm.
Halallıq ver, ömür sürdüm qoynunda,
Mat olmuşam «olum-qalım» oynunda.
Haqqım, sayım, minnətim yox boynunda,
Qoca dünya, çək bu dərdi, çək görüm.
Gözü bağlı gəldim, bağlı gedirəm,
Qəlbi qırıq, sinədağlı gedirəm.
Kəcavədə “təmtəraqlı” gedirəm,
Qoca dünya, çək bu dərdi, çək görüm.
Taleyindən narazı var, razı var,
Vətən üçün candan keçən qazi var.
Tanrısına təpik atan asi var,
Qoca dünya, çək bu dərdi, çək görüm.
Söz böyütdü, saz yaşatdı Ramizi,
Oğrun baxan göz yaşatdı Ramizi,
Bu ağ dünya az yaşatdı Ramizi,
Qoca dünya, çək bu dərdi, çək görüm.
25.05. – 02.06.2021, Xırdalan şəhəri
QARDAŞ
Torpağın ətrindən, iyindən duydum,
Bu bizim doqqazın qaşıdı, qardaş.
Üstündə oturdum, yumşaq göründü,
Daş həmən çəpərin daşıdı, qardaş.
Nə vaxtdı gəlmirdim, gəlmişəm indi,
Kəkliklər dil açdı, turaclar dindi.
Anamın laylası baldan şirindi,
Yanan ürəyimin başıdı qardaş.
Süfrəmiz qonaqsız, adamsız qalıb,
O duzsuz, o dadsız, o tamsız qalıb.
Yurd-yuva, ev-eşik atamsız qalıb,
Yaşayan divarı, daşıdı, qardaş.
Qəfil şimşək çaxdı, bulud hönkürdü,
Göylər nərə çəkib leysan tökürdü.
Çağlayan nə Araz, nə dəli Kürdü,
Ramizin gözünün yaşıdı, qardaş.
12.07.2021, Xırdalan şəhəri
BU DÜNYANIN KÖÇÜ
Bu dünyanın köçhaköçü qurtarmır,
Qəflə qatır ora-bura daşıyır.
Boz dəvələr uzun-uzun yolların
“Damarını qıra-qıra” daşıyır.
Köç yolunda eniş-yoxuş çox çıxır,
Düz biyaban, dərə-təpə, dağ çıxır.
Bahar gəlir, torpaq qızır, buğ çıxır,
Günəş nuru səmalara daşıyır.
Yerlə, göylə baş-başadı bu dünya,
Müəmmadı, tamaşadı bu dünya.
Milyon-milyon sirr yaşadır bu dünya,
Milyon ildi suallara daşıyır.
Çox göstərib qüdrətini, gücünü,
Kim yuyacaq bu dünyanın “suç”unu?
Gədiklərə Xan Kərəmin köçünü,
Məcnunları səhralara daşıyır.
Ramiz, kim ki, el dərdini duymamış,
Bir kimsəyə xətir-hörmət qoymamış,
Tamah əhli gen dünyadan doymamış,
Əcəl onu dar məzara daşıyır.
21.11.2019, Xırdalan ş.
