Yollar məndən keçir sənin yanına
Üzdüm ayağımı yollardan daha,
Yenə yarıyolda qırıldı yollar.
Sevgi yollarında izimiz qaldı,
İzlərin boynuna sarıldı yollar.
Mənsiz də yaşaya bildin birtəhər,
Mənsiz də qapını döydü sözlərim.
Arxamca bir ovuc söz də tulladın,
Gəlib ürəyimə dəydi sözlərin.
Bu ölən sevginin qatili oldun,
Özün ağla ona,özün yan ona.
Onsuz da yollardan keçmirəm daha,
Yollar mənnən keçir sənin yanına.
Siyasət əlindən qaça bilmirəm
Siyasət əlindən qaça bilmirəm,
Muğanda siyasət, Mildə siyasət.
Biznesmen biryeli siyasət satır,
Hambal da gəzdirir beldə siyasət.
Siyasi doğulan ölür siyasi,
Gedənlər təzədən gəlir siyasi.
Gözəl də üzümə gülür siyasi,
Dodaqda siyasət, dildə siyasət.
Xalqın qazanında siyasət bişir,
“Bəxt loto”alıram siyasət düşür.
Barmaq hədələyir, diz torpaq deşir,
Ayaqda siyasət, əldə siyasət.
Ata siyasətlə oğul saxlayır,
Ana siyasətlə qızın yoxlayır.
Qızı siyasətlə könül oxlayır,
Vərdişə çevrilib eldə siyasət.
Siyasi söhbətlər gedir iş günü,
Siyasət yaradır hər ilişgini.
Bu “gəliş”günüdü, bu “gediş”günü,
On bir ay bayramdı ildə siyasət.
Tofiq, nə əlsiz qal, nə düş əllərə,
Tofiq, dilsiz qal, nə düş dillərə.
Tofiq, nə evdə qal, nə düş çöllərə,
Ev də siyasətdir, çöl də siyasət.
