Çıxır
Hərdən durub,düşünürəm,
Vallah ağlım,başdan çıxır.
Milyonerlər ölkəsində,
Çörəyimiz daşdan çıxır.
İşləyirik, yorulmuruq,
Talanırıq, qurulmuruq,
Nə yaxşı ki, qırılmırıq,
Dırnaqda papışdan çıxır.
Hər arzumuz,diləyimiz,
Çindən gəlir gərəyimiz.
Zay toxunur köynəyimiz,
İlmələr naxışdan çıxır.
Bəzən şeir qoşandada,
Ağlım gedir coşandada,
Oğul bala çaşandada,
Dədə nazir işdən çıxır.
Danışmıram,lal oluram,
Eşitmirəm, kar oluram.
Dinsəm günahkar oluram,
Tiryək gəlib aşdan çıxır.
Daha heç kəs döz ha demir,
Əyri duran düz ha demir.
İndi dildə söz ha denir,
Sözlər gözdən.qaşdan çıxır.
Cavanşirəm.dözə-dözə,
Bir yük oldu, ömür bizə.
Gəl qayıdaq kəndimizə,
Kəndimiz də qışdan çıxır.
Mən
Şeir yazmayanda, nəfəsim çatmır,
Sanki bir ümmanda boğuluram mən.
Bir misra yazanda gözlərim gülür,
Elə bil təzədən doğuluram mən!
Kimi dərdli görsən eyinən mənəm,
Kimi şəhid görsən deyinən mənəm.
Ölməmiş kəfəni geyinən mənəm,
Qanımla torpaqda yoğruluram mən.
Dolub-boşalıram,bir çanaq kimi,
Gah dəçəl oluram,mən uşaq kimi.
Yağışda lillənən bir bulaq kimi,
Axıb çağladıqca duruluram mən.
Cavanşir ocağım, qorum burdadır,
Beşiyim burdadır, gorum burdadır.
Sevgim bu Vətənə, doğma yurdadır.
Hər an sevə-sevə vuruluram mən.
Hünər — mənim hünərimdi
Komandanım, mətin dayan, səngər mənim səngərimdi!
Torpaq mənim torpağımdı, əsgər mənim əsgərimdi!
Gör nə qədər Mübarizim, İsgəndərim, Əmrahım var,
Zəfər mənim zəfərimdi, hünər mənim hünərimdi!
Neçə ildi göz yoldadı, dərd gətirir qışım, yazım
Vecsiz ömür, ötərgi gün, kimə gərək, kimə lazım?
Səngər evim, silah dostum,savaş mənim alın yazım,
Tale mənim taleyimdi, qədər mənim qədərimdi!
Göydən gəlmir,yerdə gəzir içimizə düşən bəla,
Bir əsirdə dörd faciyə yaşayırıq dalbadala.
Torpağım qan,suyum məlhəm, yurdum meydan daşım qala,
Əzab mənim əzabımdı, kədər mənim kədərimdi!
Tarix bilir, Fələk görür nə şərim var, nə yalanım,
Yol gözləyən İrəvanım, həsrət qalan Savalanım.
Qarabağım, qara bəxtim, oda düşüb yanan canım,
Nisgil axan Arazımdı,gözü dolan Xəzərimdi!
Mil ayağım, Muğan könlüm, Şirvan köksüm, Qafqaz başım,
Bakı qəlbim, Təbriz canım, ulu Gəncə qan yaddaşım,
Naxçıvanım, Lənkəranım, Dərbənd,Göyçə ömrüm yaşım,
Bu yurd mənim son mənzilim, bu yurd mənim əzəlimdi!
Cavanşirəm, mən əsgərəm, hər an oyaq, hər an hazır!
Qanım coşur, göz yaşarır ürək dolur, qələm yazır!
Vartanların qəbirini İvan qazır, sergey qazır,
Bu söz mənim haqq sözümdü, xəbər mənim xəbərimdi!
2018
