Boş şeydi
Sandım ki, gün gələr, düzələr ölkə,
İndi görürəm ki, nəsə boş şeydi.
Aldana-aldana dələduzlara,
Düşmüşəm mən küyə, səsə — boş şeydi.
Hər kəmər örkəndi, hər qarın tala,
Hər kəda bir xandl, hər saray qala.
Lülə quruduram, lülə, ay bala…
Verirəm özümü hisə, boş şeydi.
Çıxardın başlardan, bozbaş, dolmadı,
Kef çəkmək, qocalmaq bizlik olmadı.
Neftiylə dolmadı, qazla dolmadı,
Moruqla dolacaq kisə- boş şeydi.
Axı
Daha bu qədər olmaz!..Qoyub qoyun yerinə,
Başımızdan basırlar, durmur boyun yerinə.
Kimin geyin yerinə, kimin soyun yerinə,
Babalı yuya- yuya, kirə çıxırıq axı…
Elə bil heç kəs görmür bu boyda günahları!?
Tullasan it də yeməz yediyimiz haqları.
Yandırıb çıraqları, söndürüb ocaqları,
Dizimizdə duz- çörək, pirə çıxırıq axı…
Hanı o hay- haraylar?- Canımızda can yoxdu,
Salınıb hasarlara , o köhnə meydan yoxdu,
Yerə lağım atırıq, dama nərdivan yoxdu,
Çıxsaq da səsə- küyə, tirə çıxırıq axı…
Çöldə itlər ulaşır, yüyrəkdə körpə yatmır,
Sanki qurd- quş çoxalır, nəsə bu millət artmır…
Allaha əl açırıq, Tanrıya da zəng çatmır,
Yüzikini yığırıq, şirə çıxırıq axı…
