AĞ ÖLÜM
Ölkədə çoxalıb «ağ ölüm» yaman,
Gedir çox həyatlar boşa, heyifdir.
Bu yoldan uzaq ol, çalış hər zaman,
Sözlərin gəlməsin «kaş» a heyifdir.
Bir şey ki, sonunda çökürsən gəlib,
Boynunu yetimtək bükürsən gəlib,
Sən nəyin kefini çəkirsən gəlib?
Gəlməsin bu halın xoşa, heyifdir.
Niyə puç edirsən ruh və cismini?
Görüb ağlayırsan köhnə rəsmini,
Narkoman sözünü, sənin ismini,
Bir yerdə çəkirlər qoşa, heyifdir.
Bir sürü parazit sağ və solunda,
Rolunu göstərir şeytan rolunda,
Atanın-ananın sənin yolunda,
Tökdüyü gözdəki yaşa heyifdir.
Tab elə döz bir az, özünü sıxıb,
Qalib ol, yaşa xoş, tamahı yıxıb,
Axırı bilinməz bir yola çıxıb,
Dönürsən hər dəfə başa heyifdir.
Get haqqın yolunu, azana qədər,
Yerində «on kruq» yazana qədər,
Satmısan evində qazana qədər,
Dəydikcə başın hər daşa heyifdir.
Dinsin qoy bir dəfə vicdanın barı,
Puç etmə bu qədər gənc həyatları,
Satdırıb, satırsan bu zəhrimarı,
Olma gəl heç kəsə maşa, heyifdir.
Zillətə qoşulub, çəkmə kədər-qəm,
Gəl əqli-kamala, yaşama sərsəm,
Cilovla nəfsini, ram elə hər dəm,
Qoyma düz yolundan çaşa heyifdir.
İnsanın pak-təmiz adı başqadır,
Düşəndə doğması-yadı başqadır,
Həyatın ləzzəti-dadı başqadır,
Həyatı həyattək yaşa, heyifdir…
A bala
Yaşamaqdan yana hər gün utanırsan, şükür et,
Qorxudan söz deməyib, haqqı danırsan, şükür et,
Bir tikə, loxma çörək ki, qazanırsan, şükür et,
Sus, siyasət eləyib, etmə ki, meydan a bala,
Sonda cismin yaşayıb, görməyə zindan a bala.
Çox saxlama gəl ağızda bu qədər bağlı dili,
Bir siyasətlə çalış işlədəsən ağlı, dili,
Nəbzi tut, tərif elə, zəhmətə sal yağlı dili,
Düşdü hardan əlinə hər səfər imkan a bala.
Yaxşı gün görməmisən, pis görünürsən hələ də,
Üzə çıxmaq hünərin yox, bürünürsən hələ də,
Yarıdan keçmiş ömür, sən sürünürsən hələ də,
Yaxşı pul olsa verən, sat pula vicdan a bala.
Yapışıb saqqız olub, qırlanacaqlar həmişə,
Şit zarafat eləsən, hırlanacaqlar həmişə,
Pulun olsa, başına fırlanacaqlar həmişə,
Mütləq əvvəldə gəlir pul,vəzifə şan a bala.
Pul haramdan qazanıb, şansı güdərsən, nə var e,
Sən ki, öyrəncəlisən, pislik edərsən, nə var e,
Sonra bir fürsət edib Həccə gedərsən, nə var e,
Silinər cəmi günahlar doğulandan a bala.
Helekopter, gəmilər zad, adına yaxta ki var,
Xan-bəyə layiq olan tac, qızılın, taxta ki var,
Kürsüdən bərk ki yapış, qopmayasan vaxta ki var,
Yeddi son nəsli-nəcabətdə yaşat can a bala.
Verməsinlər pulu qoy, işlədərək fəhləmizi,
Demə: İcra niyə asfaltdamadı məhləmizi?
Daha bəsdir, deyinib tökmə hədər zəhləmizi,
Yaşa qullar sayaq ol, olma da peşman a bala.
