Bir də ayıldıq ki…
İllərdi ayrılıb öz ruhumuzdan
Min ağac uzağa atılan daşıq.
Bizi bu menyuya salanlar ölsün,
Özgə süfrəsində buğlanan aşıq.
Pisin arxasına düşüb gedirik,
Yaxşını görməyə hamımız çaşıq.
Tək bircə düz çəkən tərəzi olsa,
Hamıdan ucayıq, hamıdan başıq.
Neçənci yuxuydu bilmirəm amma,
Bir də ayıldıq ki,ayılmamışıq…
Hərə istədiyi zurnanı çaldı-
Mərifət gözəldi,ədəb yaxşıdı…
Biri qanımızı farsa caladı,
Biri tovladı ki,ərəb yaxşıdı.
Biz ancaq kitabdan oxuduq ki,bəs,
Dünyada hər şeydən şərəf yaxşıdır.
İthürən tərəfə getməyə qorxduq,
Dedik işıqgələn tərəf yaxşıdı.
Zülmətə apardı bizi o işıq.
Bir də ayıldıq ki, ayılmamışıq…
Qovub çıxartdılar köhlən atları,
Qaldı qatırlara yaşıl zəmilər.
Baxmayın dağ boyda göydələnlərə,
Çıxdı sonumuza bu zirzəmilər.
Burnunu dalğalar elə ovdu ki,
Çatladı dağ boyda polad gəmilər.
Hardan gəldiyini kəsdirəmmədik,
Qəfil peyda oldu vampir əmilər,
İçdi qanımızı hey qaşıq-qaşıq,
Bir də ayıldıq ki, ayılmamışıq.
Yorğun baxışının qadasın alım,
Tək əldən səs çıxmaz,tək əldən, eyy, tək..
Görmürsən nə cürə yallı gedirlər,
Bu xalqın yasında bir sürü təlxək.
Nolar çayımızı zəhər eləmə,
Qoy fürsət bulmuşkən adamtək içək.
Sənin bildiyini mən də bilirəm,
Bəsdi də,bəsdi də yaxamnan əl çək.
Bu hirsli vaxtımda nə başlamısan,
Xətai, Cavanşir, Koroğlu, Babək…
Mən axı neynim ki, aşıq, ay aşıq.
Biz hələ yuxudan ayılmamışıq.
Dədə
Bu səhvdə qazancım mayamı yedi,
İndi də o səhvə gedirəm dədə.
Sabah nə olacaq Allaha pənah,
Qapandı bu səhifə gedirəm, dədə.
Kor bəxtin dizində falçı dururam,
Hər səhər yuxudan balçı dururam,
Dərdə də gedəndə alçı dururam,
Elə biı ki, kefə gedirəm dədə.
Küləknən, yağışnan təzələnirəm,
Yuvamda su kimi özələnirəm,
Bir ucuz bazardı, çözələnirəm,
Dönmüşəm kələfə gedirəm dədə.
Öküz cütləyirəm, kotan sürürəm,
İtim yorulanda özüm hürürəm,
İllərin gözünə kül üfürürəm,
Blefdən-blefə gedirəm dədə.
Bal kimi dadlıdı, bir acı qüllab,
Kəsmədim heç zaman hesabı pulla,
Əlinə keçəndən heybəmə tulla,
Başlanıb ərəfə, gedirəm dədə.
İtəsi-batası adım ha yoxdu,
Qurd məni nə yesin dadım ha yoxdu,
Sənnən zarafatım-zadım ha yoxdu,
Doğrudan bu dəfə gedirəm dədə.
Bir yuva haqqım var ağacdələndə,
Alaram üzümə həyat güləndə,
Canım çox yanıbdı işıqgələndə,
İtürən tərəfə gedirəm dədə.
Fırtına qopacaq sinəmdə, kəsin.
Havası tutubdu məni bir səsin,
Mən ölənə kimi heç kim ölməsin,
İçib bu şərəfə, gedirəm dədə.
